नेपाली क्रिकेटले हात पारेका सबै सफलताका साक्षी हुन्, शक्ति गौचन। सन् २००१ मा १७ वर्षमुनीको राष्ट्रिय टोलीबाट नेपाली जर्सीमा क्रिकेट खेल्न थालेका उनले १७ वर्ष बढी अविरल रुपमा क्रिकेट खेले।
नेपाली क्रिकेटको सफलता यही १७ वर्षभित्र घुमेको छ। यही क्रममा नेपालले डिभिजन पाँच, चार, हुँदै एकमा स्थान बनायो। टी–२० विश्वकप खेल्यो अनि एक दिवसीय मान्यता पायो। सबैमा शक्ति थिए र यही साउन मध्यमा नेपालले नेदरल्याण्ड्ससँग पहिलो एक दिवसीय सीरिज खेल्दैछ र उक्त ऐतिहासिक सीरिजको पुनः साक्षी बनेसँगै शक्तिले अन्तर्राष्ट्रिय क्रिकेटबाट अलग रहने घोषणा गरिसकेका छन्।
२०१४ को टी-२० छनोटमा विकेट लिएपछि शक्ति गौचन
सन्यास घोषणाका शब्दहरु बोल्दै उनले भने, 'यो नै सहि समय हो अगाडी बढ्नका लागि। म नेदरल्याण्ड्समा नेपालको पहिलो एक दिवसीय अन्तराष्ट्रिय खेलेर बिदा लिँदैछु। अबको टोलीले टेष्ट खेलेर बिदा लियोस्।'
शक्तिको क्रिकेटसँगको नाता कति गाडा छ, उनले दोस्रो वाक्यमा व्यक्त गरे, 'यो मेरो पहिलो चरण सकिएको छ। अब म दोस्रो चरणमा फरक भूमिकामा आउनेछु। क्रिकेटसँग सँधै जोडिरहनेछु।'
अर्थात शक्तिको स्पिनलार्इ नेपाली घरेलु क्रिकेटमा अझै देख्न पाइनेछ।
ब्याटिङमा शतक अनि बलिङमा ह्याट्रिक
अन्तराष्ट्रियसँगै नेपाली घरेलु क्रिकेटमा भएको परिवर्तनको साक्षी समेत हुन्, शक्ति। ३४ वर्षिया शक्तिसँगै अहिलेको टोलीमा रहेका बसन्त रेग्मीले मात्रै जय ट्रफीको अनुभव बटुलेका छन्। त्यसयता विरेन्द्र ट्रफी, टी–२० र एक दिवसीय प्रतियोगिताहरु हुँदै फ्रेन्चाइजीको व्यवसायीक लिगमा नेपाली क्रिकेट प्रवेश गरिसक्यो। शक्ति सधैँ यी सबै घरेलु प्रतियोगितामा ‘फ्रन्टम्यान’ भएर रहे।
घरेलु क्रिकेटमा उनी नेपाल प्रिमियर लिगमा जगदम्बा जाइट्स, धनगढी प्रिमियर लिगमा रुपन्देही च्यालेन्जर्स, एभरेष्ट प्रिमियर लिगमा पोखरा राइनोजको कप्तानी गरेका छन् भने राष्ट्रिय लिगहरु एपीएफबाट खेल्ने गरेका थिए।
सन् २००२ मा ओमनविरुद्धको खेलबाट उनले सिनियर राष्ट्रिय टोलीमा डेब्यू गरेका थिए। धेरैले उनलाई एशोसियट क्रिकेटकै उच्चस्तरिय बलरका रुपमा पनि चिन्छन् तर शक्तिले राष्ट्रिय टोलीबाट शतक समेत प्रहार गरिसकेका छन्।
डेनमार्कविरुद्ध ह्याट्रिक लिएपछि शक्ति गौचन
सन् २००५ को आइसीसी विश्वकप छनोटमा उनले इटालीविरुद्ध १ सय ३ बलमा १ सय ६ रन प्रहार गर्दै नेपालबाट अन्तराष्ट्रिय क्रिकेटमा शतक प्रहार गर्ने उनी दोस्रो खेलाडी बनेका थिए। तर, नेपाली टोलीबाट एक हजार रन पूरा गर्ने भने उनी पहिलो ब्याट्सम्यान हुन्।
टेस्ट क्रिकेटबाट प्रेरित शक्ति ढिलो ब्याटिङ गर्थे। तर, टी–२० क्रिकेट लोकप्रिय बन्न थालेपछि शक्तिले बलिङमा जोड दिए। उनी राष्ट्रिय टोलीबाट पहिलो ह्याट्रिक लिने खेलाडी समेत हुन्। २०१५ मा उनी टी–२० बलहरुको विश्व वरियतामा १७ औं स्थानमा पुगेका थिए। त्यसले पनि उनी विश्वस्तरिय बलर रहेको प्रमाणित गर्छ।
लगातार उत्कृष्ट प्रदर्शन
सन् २००१ बंगलादेशमा भएको एसीसी यू–१७ एसिया कपबाट उमेर समूहको नेपाली राष्ट्रिय टोलीमा स्थान बनाएका शक्तिले अर्को वर्ष न्यूजिल्याण्डमा भएको आइसीसी यू–१९ विश्वकप खेलेका थिए। सोही टोलीले पाकिस्तान र बंगलादेश जस्ता टेस्ट राष्ट्रलाई पराजित गरेको थियो।
त्यसपछिका दुईवर्ष उनले यू–१९ टोलीमा विताए र सन् २००३ मा यूथ एसिया कप, २००४ मा पुनः आइसीसी यू–१९ विश्वकपमा भाग लिए। सोहीवर्षको मार्चमा उनले सिनियर टोलीमा डेब्यू गरेका हुन्। सिनियर टोलीबाट प्रथम श्रेणीको क्रिकेटमा उनले सोही वर्ष भएको आइसीसी इन्टरकन्टेनेन्टर कपमा यूएईविरुद्धको खेलबाट गरेका थिए।
२००२ को एसीसी ट्रफीमा उनको उत्कृष्ट प्रदर्शनमा नेपाल ट्रफी उचाल्ने नजिकै पुगेपनि फाइनलमा यूएईसँग पराजित भएर उपविजेता बनेको थियो। उनले सनसनीपूर्ण २.२८ को औषतमा बलिङ गर्दै ७ विकेट हात पारेका थिए। १० राष्ट्र सहभागी उक्त एक दिवसीय प्रतियोगितामा सबैभन्दा कसिलो बलिङ उनको थियो। ब्याटिङमा पनि शक्ति उक्तिकै जमे। ६ खेलमा ४१.३३ को औषतमा २ अर्धशतकसहित उनले २ सय ४८ रन प्रहार गरेका थिए।
२०१० को एसियन गेम्समा चोटका कारण टोली भन्दा बाहिर रहेका उनले दुईवर्षपछि सफल पुनरागमन गरेका थिए। कतिपय खेलाडीहरुलाई चोटपछि टोलीमा फर्कन गाह्रो हुन्छ तर उनले कहिले मेहनत छाडेनन् र निरन्तर लागि रहे। जसले शक्तिलाई शक्ति द पावरको उपनामले पनि चिनायो।
ट्रकका पछाडी शक्तिको पोस्टार
२०१२ को आइसीसी विश्व टी–२० छनोटमा पुनः राष्ट्रिय टोलीमा डेब्यू गरेका उनले सो प्रतियोगितामा १६ विकेट लिंदै सर्बाधिक दोस्रो उच्च विकेट टेकर भए। त्यसै प्रतियोगितामा उनले डेनमार्कविरुद्ध ह्याट्रिक पनि लिएका थिए। सो प्रतियोगितामा कप्तान पारस खड्कापछि प्रतियोगिताकै उत्कृष्ट ११ खेलाडीमा चुनिने नेपालका अर्का खेलाडी थिए।
शक्तिलाई इंण्डियन प्रिमियर लिग आइपीएल टोली राजस्थान रोयल्सले पनि ट्रायलका लागि बोलाएको थियो। जसमा उनले राहुल ड्रविडलाई प्रभावित पार्नुका साथै अस्ट्रेलियन ब्राड होड्जको विकेट लिएका थिए। राजस्थान रोयल्सले ट्विट गर्दै लेखेको थियो, ‘शक्ति गौचनले अहिले नेट्समा आफ्नो महत्वपूर्ण अनुभवहरु बटुलिरहेका छन्। यसले कुनैदिन नेपाललाई ठूलो उत्साह दिनेछ।’
त्यो स्पेल: १०-८-२-३
२०१० को आइसीसी विश्व क्रिकेट लिग डिभिजन चारमा नेपाललाई च्याम्पियन बनाउँदा उनले कीर्तिमान कायम राखे। मलेसियाविरुद्धको खेलमा १० ओभरमा ८ ओभर मेडन राख्दै २ रन दिएर ३ विकेट दिनु एशोसियट नेशनको एक दिवसीय क्रिकेटकै सबैभन्दा राम्रो स्पेल थियो। त्यसअघि एक दिवसीय अन्तराष्ट्रियमा भने पाकिस्तानविरुद्ध १९९२ मा वेस्ट इन्डिजनका फिल सिमन्सले १० ओभरमा ८ ओभर मेडन राख्दै ३ रन दिर ४ विकेट लिएका थिए।
त्यसबेला उच्च लयमा रहेका शक्तिले २०१२ को एसीसी ट्रफी एलिटमा १५ विकेट, सोही वर्ष भएको आइसीसी विश्व क्रिकेट लिग च्याम्पियनसिपमा १६ विकेट र डिभिजन चारमा १० विकेट लिएका थिए।
टी-२० विश्वकपमा हङकङविरुद्ध विकेट लिएपछि खुशी मनाउँदै शक्ति गौचन
२०१४ मा बंगलादेशमा भएको आइसीसी टी २० विश्वकपमा शक्ति गौचनले हङकङविरुद्ध खेल्दा नेपाललाई ८० रनको जित दिलाउन ३ विकेट लिंदै म्यान अफ द म्याच भए। विश्वकपमा नेपालले तीन खेल खेल्दा उनले पाँच विकेट लिएका थिए।
त्यसपछि २०१४ को डिभिजन तीन र २०१५ को डिभिजन दुईमा नेपालबाट उत्कृष्ट प्रदर्शन गरेका शक्ति पछिल्लो पटक भने सन्दीप लामिछाने, सुशान भारी जस्ता खेलाडी उदाउँदा बढी समय बेञ्चमा थिए। तर, बेञ्चमा बस्दा पनि उनले खेलाडीलाई उत्प्रेरणा गर्ने कामबाट भने कहिलै पछि हटेनन्।
No comments:
Post a Comment