फाप्लाको माटोमा पसिना बगाउँदा...

  एकाबिहानै फोन आउँछ, मैले हलो भन्न पाएको हुदैँन उताबाट प्रश्न तेर्सिन्छ, कता हो सुमन जी। कति वेला पुग्नुहुन्छ?

यहाँ सुमन केही अरु नभएर म आफै(यज्ञराज) हो।

कक्षा १० तिर पढ्दा हामी साथिहरुबीच उपनाम (निकनेम) राख्ने खुब प्रचलन थियो त्यति बेला नै मैले छनौट गरेको निकनेम हो “सुमन”।

जुन  मैले हरेक ठाउँमा नामसँगै प्रयोगमा ल्याए। र जुन नामले मलाई मेरा धेरै आदारणीय साथीले तथा सरहरुले सम्झनु पनि हुन्छ।

प्रायः दैनिक जसो बिहान मलाई फोन गरेर कता हो सुमन जी भन्ने ती मध्येकै एक आदारणीय सर हुनुहुन्छ।

प्रत्येक दिनका ती फोन कल अरु कसैका नभएर सुवास सरका हुने गर्दछन। जहिले नि उहाँ म भन्दा पहिले बिहानै फाप्ला पुगेर ग्राउण्डबाट मलाई फोन गर्नुहुन्छ। अनि मैले नि तत्काल मैदानमा पुग्नुपर्छ। 

प्रसंग फाप्ला क्रिकेट मैदान निर्माणको हो।

बहुप्रतिक्षित नेपाल प्रिमियर लिग (एनपीएल) को उद्घाटन धनगढीबाट हुने भएपछि हाम्रो टीम मैदान निर्माणमा जुटेका छौ।

जहाँ बिहान देखि बेलुकासम्म हामी मैदान निर्माणकै काममा व्यस्त रहन्छौ र जुन हाम्रो दैनिकी बनि सकेको छ। एकाविहानै चियाको चुस्की लगाउन नपाउदै मैदान प्रवेश गर्ने हामी साझँ अध्यारो भै सक्दा समेत मैदानमै व्यस्त हुन्छौ।

हामीले बुझेका छौ नेपालमै पहिलो पटक हुन लागेको एनपीएलको महत्व।

एनपीएल अयोजनाको जुन अवसर हामीले पाएका छौ, त्यसलाई सफलतापुर्वक सम्पन्न गर्नु जिम्मेवारी हाम्रो काधमा थपिएको छ। र त्यो कार्यभार हामी पुरा गर्न पुर्ण प्रतिबद्ध छौ र सम्पन्न गर्ने छौ पनि। पहिलो पटक चर्चित राष्टि्य खेलाडी तथा क्रिकेटका अनुहारहरु यसै प्रतियोगिताले धनगढी भित्रदै छन्।

उनीहरुको व्यक्तित्व अनुसारको व्यवस्था हामीले गर्नुपर्ने छ। र त्यसमा हामी कटिबद्ध भएर लागेका पनि छौ। अर्का तर्फ धनगढीले पाएको यस अवसरमा कुनै कसुर बाकी नरहोस भनि हामीले हाम्रो आयोजनाको क्षमता पनि त राष्ट्रलाई देखाउनु छ।

प्रतियोगिता सफलता पुर्वक सम्पन्न गर्न सक्यौ भने हामीलाई अझै यस्ता अझै धेरै राष्ट्रिय कार्यक्रम धनगढी केन्द्रित हुने विश्वास छ। सधै राजधानी केन्द्रित हुदै आएका ठूला प्रतियोगिताहरु एनपीएलको सफलतासँगै धनगढी भित्रने विश्वासका साथ पनि दिनभर हामी फाप्लाको माटोमा पसिना बगाउदैछौ। 

धनगढीले एनपीएल आयोजना गर्ने मौका पाएको दोस्रो दिनदेखि हामी काममा दौडियौ। किनकी समय छोटो थियो तर काम गर्नु पर्ने धेरै। अनि तत्काल काम गरि नहाले प्रतियोगिता नै प्रभावित हुने डर।

हामीले जुन हालतमा पनि एनपीएल धनगढीमा भव्यताका साथ सम्पन्न गर्नुपर्ने छ। त्यसैले सवैकाम तत्काल सुरु गरि हाल्नु पर्ने थियो। सुरुमा हामी सवै जना बस्यौ। जहाँ क्षेत्रिय क्रिकेट विकाश समिती क्षेत्र नम्बर ९ का उपाध्यक्ष तथा एनपीएल आयोजनाको मुख्य जिम्मेवारी पाउनु भएका तथा धनगढीलाई क्रिकेटको शहर भनेर चिनाउने आदारणीय सर सुवास शाही, क्यानका केन्द्रीय सदस्य धिरेन्द्र साउँद, क्रिकेटका प्रशिक्षकहरु अर्जुन खड्का, बिक्रम विष्ट, समितीका पदाधिकारी लगायत यहाँका क्रिकेट प्रेमीहरुको उपस्थिती थियो।

जुन हाम्रो सुरुवात भन्नुपर्छ। यो टर्निङ प्वाईन्ट पनि हो। त्यहाँबाट हामीले एनपीएलको तयारी के कसरी थाल्ने भन्ने विषयमा छलपल थाल्यौ।

सबैको पहिलो प्राथमिकता मैदान निर्माण हुनुपर्ने थियो र सवैले सुरुमा त्यसैमा ध्यान केद्रित गर्यौ पनि।

अन्य आवश्यक कुराहरु भने सँगसँगै अगाडि लैजाने निष्कर्षमा पुगे सँगै अब पालो “एक्सन” को थियो। हाम्रो छलफल कुन मैदानमा प्रतियोगिता आयोजना गर्ने भन्ने विषयमा पनि केँन्द्रित भयो।

एनपीएल आयोजना गर्न लायक धनगढीमा २ वटा मैदान छन। एउटा धनगढीको बिच भागमा रहेको अञ्चल प्रहरी कार्यालयको खेल मैदान (जहाँ एसपीए कपको पनि आयोजना हुने गर्दछ ) र अर्को चाही धनगढीबाट २ किलो मिटर उत्तरमा अवस्थित फाप्ला क्रिकेट मैदान (जहाँ धनगढी क्रिकेट लिग आयोजना भैरहेको छ )।

छलफल गर्दै जाँदा अञ्चल प्रहरी कार्यालयको मैदानको चौडाई केही सानो हुने तथा लगत्तै धनगढी भ्रमण गर्न लागेको मुम्बईको टोलीका लागि त्यो मैदान उपर्युक्त हुने भए पछि एनपीएलको लागि निर्बिकल्प फाप्ला मैदान चयन भयो। 

दोस्रो दिन क्रिकेट प्रशिक्षक अर्जुन खड्का, सुवास सर म फाप्ला मैदानमा गयौ। दिनको चर्को घाममा त्यसको लम्बाई , चौडाई नाप्यौ। हामीमा एनपीएल आयोजनाको उत्साहले होला, घामले खासै असर गरेन। आकार नापीसके पछि मैदान उपयुर्क्त रहेको प्रशिक्षक अर्जुन खड्काले बताउनु भयो।

मैदान उपर्युक्त भएपछि सुरुमा मैदानको अनुमति लिनुपर्ने थियो। जसका लागि स्थानियसँग को छलफल आवश्यक थियो। त्यसका लागि सुवास सर आफै जुट्नु भयो र स्थानियले खुशी साथ मैदान एनपीएलका लागि हस्तान्तरण पनि गरे।

त्यतिवेला फाप्लामा जाने एउटा कच्ची बाटो मात्र थियो, बिजुलीको व्यवस्था थिएन, खेल्न लायक पिच थिएन, मैदान अग्लो होचो थियो। मैदानसँग पुग्ने कुनै यातायातका साधनको व्यवस्था थिएन। हरेक कुरा चुनौती बनेर एक पछि अर्को गर्दै अघिल्तिर तेर्सिदै गए।

तर असम्भव के छ र, एक पछि अर्को गर्दै सवै कुराको अभाव पुर्ती गर्ने उद्येश्य बोकेका हामीले आज त्यहाँ सवै कुरा पुर्‍याएका छौ। सर्वप्रथम फाप्लाका लागि स्थानीय निकायहरुसँग सहकार्यमा एनपीएलकै लागि यातायातको व्यवस्था गरिएको छ।

फाप्लासम्म पुग्ने बाटो निर्माण भैसकेको छ। मैदानसम्मै बिजुलीका पोलहरु  गाडी, बिधुत लाईन जडान भैसकेको छ।

मैदानमा प्रयाप्त खानेपानीको आपूर्तिको व्यवस्था पनि मिलाई सकिएको छ।  मैदानको आउटफिल्ड निर्माण कार्य अन्तिम चरणमा छ। पिच निर्माणमा कालिगडहरु तथा हाम्रो टीम चौविसौ घण्टा खटिएको छ। असम्भव जस्तै देखिने फाप्ला मैदान निर्माण कार्य अन्तिम चरणमा पुगेको देखेर सवै अचम्मित छन्।

अहिले फाप्लामा भएको परिवर्तनको एक फोटो फेसबुकमा राख्ने हो भने, फाप्लामा भएको परिवर्तनले आश्चार्यमा पर्ने धेरै छन र सवैले निर्माणमा जुटेका सवै टीमलाई स्यावासी र धन्यवाद दिईरहेकै हुन्छन जसले हामीलाई काममा थप उत्साहित पारेको छ जुन फाप्लाको माटोमा पसिना बगाउदाको सुखद परिणाम पनि हो।